Rabattaktion

Bildquelle: www.berliner-zeitung.de

I foahr jo imma schnöll mit mein SUV. De aundern PKW huschn rechts vo mia nur so vorbei. Geht goar net aunders, weil der Gasfuaß oafoch so schwar is. Mei Frau schimpft zwoar imma, oba des hülft a nix. De Kieberer wissen scho, wo sie si aufstölln miassn mit earnara Radarpistoln und so passierts holt imma wieda, dass blitzt. Heier hob i deswegn scho gaunz sche vü zoid. Die Raubritterobteilung der Steiermärkischen Laundesregierung hot a Murds Freid mit mia, weil I mit meine Beiträg des Defizit im Rauhmen holt. Ohne mi warn´s jo scho pleite.

Bildquelle: www.nzz.ch

Oba I bin jo a net bled. I bin zwoar a guada Dodl, oba ausnutzn des loss i mi a net. Drum hob i eana gschriebn, das mia des z´bled wird mit meine ehrenaumtlichen Obgobn und ich daher erwäge, in Zukunft mi streng aun de Geschwindigkeitsbegrenzungen zu holtn. Jo, des hätt´s segn solln, gaunz hektisch sand´s wurdn. Da Laundeshauptmann und a sei Stöllvertreter hobn mia zruck gschriebn, dass i mia des do no guat überlegn soll. Weil sunst war de Steiermoark pleite.

Bildquelle: www.toonpool.com

Jo, wia scho gsogt, i bin jo wirkli a guada Dodl und so hob i mi breitschlogn lossn. Oba nur unta der Bedingung, dass i in Zukunft an Mengenrabatt kriag. Zwar hobn´s a Wai hin und her taun, oba daun hobn se sich doch zu ana Dringlichkeitssitzung zsaumgsetzt und einstimmig beschlossn, dass i jedes zehnte Strofmandat gratis kriag. Olso, ihr segst, es zoid si aus, mit de Politika amol hoart zu verhaundeln.