WEIHNOCHTSSTIMMUNG

"Na, des is koa Plastik, des is a schwea entflaumbores PehVauZeh" hot a gmoant, "Brennat wiad dea a ned!" und hot deaoatig auf seine Fiaß g'schühd, doß i a wengal nochdenkt hob, ob des PehVauZeh echt wos mit an Zeh zdoan hobn kaunn. Oba i denk ned.

Und daun is der Mensch komplett Advent-hektisch um a Schochtl umadum grennt, hot de aufgmocht, so an Besn aussezogn, aufg'stöd und daun de Astl owakloppt und daun is a do gstandn. Da Bam.

So gaunz schiach woar a jo wirkli ned, wia de Bam von friaha, wäul de woan - 'tschuidigt's scho - grod amoi uaschiach. Ned zum scheesaufn.

Und daun hot der Vakäufa an Stecker eing'steckt und der Bam hot a no so LED-Biandln einbaut g'hobt.
Bissl wenig guad g'rochn hod a. Da Bam. So noch neichn Plas ... PehVauZeh hoid.

"Des mocht goa nix" hod ma da Vakäufa gsogt, dafia hod a an supa Natur-Taunnanduft-Spräh a no und des passt scho.
Volla Stoiz hod a des gaunze Möblhaus dermoßn eig'raucht, doss de Leit stengan bliabn san und gaunz g'rüart ins Socktiachl einegschnupft hobm.

Damit's es wisst's, i woa scho oft in Woid, und der riacht goddseidaunk scho no gaunz aundas, oba wos sois, neich is neich und modern is aaa ....

So, und do steht a jetzn. Mit glitzerte Lamperl, bissl aung'schneibt hob i eam a no und Kugal aufeg'hängt. Und g'sprüht hob i a.

Jetzn hoi i no de zwoa Schaufenstapuppn aus'm Kölla, bloos de Gummi-Enkerl dazua auf und daun kema echte Weihnochtn feian.

DrDr Heinrich Hornbostl von Fesbuk